വയനാട് ദുരന്തം; സംസ്ഥാനത്ത് രണ്ട് ദിവസം ദു:ഖാചരണം

തിരുവനന്തപുരം: വയനാട് ജില്ലയിലെ മുണ്ടക്കൈ, ചൂരൽ മല പ്രദേശങ്ങളിലുണ്ടായ ഉരുൾപൊട്ടലിൽ നിരവധിപേർക്ക് ജീവൻ നഷ്ടപ്പെട്ട സാഹചര്യത്തിൽ സംസ്ഥാന സർക്കാർ അതീവ ദു:ഖം പ്രകടിപ്പിച്ചു. സംസ്ഥാനത്ത് ചൊവ്വ, ബുധന്‍ ദിവസങ്ങളിൽ ഔദ്യോഗിക ദു:ഖാചരണം പ്രഖ്യാപിച്ചു. ചീഫ് സെക്രട്ടറി ഡോ. വി വേണു ഇതുസംബന്ധിച്ച് ഉത്തരവിറക്കി. സംസ്ഥാനത്തെ എല്ലാ ആഘോഷ പരിപാടികളും പൊതുപരിപാടികളും രണ്ടു ദിവസത്തേക്ക് റദ്ദാക്കി. ഈ ദിവസങ്ങളിൽ ദേശീയ പതാക പകുതി താഴ്ത്തിക്കെട്ടും.

അതേ സമയം, ജൂലായ് 31 മുതല്‍ ഓഗസ്റ്റ് രണ്ട് വരെ പി.എസ്.സി. നടത്താന്‍ നിശ്ചയിച്ചിരുന്ന എല്ലാ പരീക്ഷകളും മാറ്റിവെച്ചു. പുതുക്കിയ തീയതി പിന്നീട് അറിയിക്കും.