ഓട്ടോ തലകീഴായി മറിഞ്ഞ് വനിതാ ഡ്രൈവർ മരിച്ചു

കോട്ടയം:നിയന്ത്രണംവിട്ട ഓട്ടോ തലകീഴായി മറിഞ്ഞ് വനിതാ ഡ്രൈവർക്കു ദാരുണാന്ത്യം. കരുനെച്ചി ശങ്കരാശ്ശേയിൽ വിജയമ്മ (54) ആണ് വെളിയന്നൂർ–മംഗലത്താഴം റോഡിൽ പടിഞ്ഞാറ്റെപ്പീടിക ഭാഗത്തു ഉണ്ടായ അപകടത്തിൽ മരിച്ചത്. 

ഇന്നു രാവിലെ ഉഴവൂരിൽ നിന്നു 2 അതിഥി തൊഴിലാളികളെ കയറ്റി കൂത്താട്ടുകുളം ഭാഗത്തേക്കു പോകുമ്പോഴായിരുന്നു അപകടം. പടിഞ്ഞാറ്റെപ്പീടിക ഭാഗത്തു എത്തിയപ്പോൾ നായ കുറുകെ ചാടി. ഇതോടെ നിയന്ത്രണം നഷ്ടപ്പെട്ട ഓട്ടോറിക്ഷ തലകീഴായി മറിഞ്ഞു. റോഡിൽ തെറിച്ചു വീണ വിജയമ്മയുടെ ദേഹത്തേക്കാണു ഓട്ടോറിക്ഷ മറിഞ്ഞത്. ഓടിക്കൂടിയ നാട്ടുകാർ ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ കഴിഞ്ഞില്ല. ഓട്ടോയിൽ യാത്ര ചെയ്ത അതിഥി തൊഴിലാളികൾ പരുക്കേൽക്കാതെ രക്ഷപ്പെട്ടു.